SHARINGYOURCHALLENGES
Sektoreak
Teknologiak
Funditec Intelligence, Funditec-en adimen artifizialean espezializatutako unitate teknologikoa, eta Fagor Arrasate, Mondragon Korporazioan integratutako kooperatiba eta ekipamendu industrialaren diseinu eta fabrikazioan mundu mailako erreferenteetako bat, akordio estrategiko batera iritsi dira Primus Robotics sortzeko. Enpresa berria robot humanoide industrialen diseinura, garapenera eta fabrikaziora bideratuko da, zeinak gaitasuna izango duten eskari handiko inguruneetan zehaztasun-, segurtasun- eta eskuragarritasun-maila altuekin lan egiteko.
Bi enpresen %50eko partaidetza izango duen joint venture honek Europan jatorria duten industria-IAko soluzio robotikoak eskaintzen lehenak izatea du helburu. Horretarako, Funditec-en adimen artifizial aplikatuan duen esperientzia eta Fagor Arrasatek ingeniaritzan, industria-automatizazioan, robotikan eta fabrikazio aurreratuan dituen gaitasunak uztartzen ditu.
Testuinguru honetan, Euskadi Europako ingurune industrial aurreratuenetako gisa kokatzen da, belaunaldi berri honetako robot humanoideak garatzeko eta ekoizteko aukera estrategiko gisa. Robot hauek ingurune konplexuetan jarduteko diseinatuta daude, makina, sistema produktibo eta logistika-prozesu aurreratuekin modu seguruan eta eraginkorrean integratuz.
Gure nabigatzaile ospetsu Juan Sebastián Elcanori eta bere armarriko leloari (“Primus circumdedisti me”: “Lehenengoa izan zinen munduari bira ematen”) keinu eginez, Primus izena aukeratu da bai enpresa bateratuarentzat, bai haren produktuentzat.
Ezkerretik eskuinera, Antonio Navarro, Funditec‑eko presidente exekutiboa, eta Unai López, Fagor Arrasateko zuzendari nagusia, Primus Robotics enpresa eratzeko sinaduraren ondoren.
Robot adimendunak industria-prozesuetarako
Konpainiaren lehen produktua Primus P1 izango da, manipulazio-, laguntza-, mantentze- eta produkzio-prozesuetako laguntza-lanak egiteko sortutako robot humanoidea. Bere adimen artifizialeko ertz-konputazioko sistema eragileari —Primus OS— esker, robotek aukera emango dute jatorriz gizakientzako diseinatutako inguruetan automatizazio-maila handitzeko, roboten, operarioen eta makineria industrialaren arteko lankidetza erraztuz.
Proiektuak industrializazio-fase hasierako bat aurreikusten du, urtean 200 robot inguruko ekoizpen-gaitasunarekin, eta epe ertainera 3.000 unitatetik gora eskalatzea helburu du. ase hau Arrasateko Fagorren plantan egokitutako 2.500 m²‑ko pabiloi batean garatuko da. Primus P1-en lehen prototipo funtzionala 2027 amaierarako aurreikusten da. Primus P1en ondoren, sektore gehiagotara egokitutako gaitasun zabalduak dituzten bertsio berriak garatuko dira.
Juan Etxebarria Fagor Arrasateko negozio-garapeneko zuzendariak adierazi du: “Robot humanoideak gure Arrasateko plantan ekoiztea azken urteotan egin dugun apustu teknologiko ausartena da. Hamarkadak daramatzagu automatizazioa, robotika eta zehaztasun-ingeniaritza integratzen gure bezeroen ekoizpen-lerroak automatizatzeko. Orain urrats bat gehiago ematen dugu: Funditec-ekin batera plataforma teknologiko bat sortu dugu, adimen artifiziala, kontrol aurreratua eta zehaztasunezko fabrikazioa uztartzen dituena, langileak lan astun, errepikakor eta arriskutsuetatik askatuko dituen robotak ekoizteko.”
Bere aldetik, Alejandro Echeverría Funditec Intelligence-ko zuzendari nagusiak adierazi du: “Primus Robotics sortzea aurrerapauso estrategikoa da misio kritikoetako sistema autonomoetarako adimen artifiziala garatzeko. Akordio honi esker, ingurune produktibo errealetara jauzia azkartu dezakegu, eta Europan adimen artifizial fisikoa deritzonaren garapena sendotu.”
Primus Roboticsen sorkuntza une estrategiko batean iritsi da, industria europarra gizakiaren esku-hartzerako diseinatutako prozesuetan robot humanoideen integrazioa bizkortzen ari denean. Automozio-sektoreko hainbat enpresak jada abiarazi dituzte Europako plantetan lehen proiektu pilotuak, robot humanoideak esperimentazio-fasea gainditu dutela eta sistema industrialen kategoria berri bat osatzen dutela baieztatuz.